Atuarfitsinni atuartut atuarfiullu oqaluttuassartamerna.
Atuarfitsinni 270-it missaat ukioq manna atuartuupput. Ukioq manna atuarfiusoq aallartimmi atuarfinnisulli allanitulli ikilisimapput, 11. klassip atorunnaarnerata kingorna.
Oqaluttuarisaanerata ilamerna.
Uummannami atuarfik tamatigut pingaaruteqartarsimavoq innuttaasunut ukiut ingerlaneranni. 1950-kkunni ilaatigut atorneqartarsimavoq napparsimavittut. Mæslingertoqalillarmat atuarfik napparsimavittut atorneqarsimavoq taavalu qalia toqusut inaattut atorneqarsimalluni.
1950-mut taamaallaat pingasunik klasseqarsimavoq: klasset mikinerit, klasse qiterliit aamma klasset anginerit. Illoqarfittut allatut atuartut amerliartorsimapput, tassani pissutaanerpaavoq atuartut angerlarsimaffiata sananeqarnera, taamaalilluni nunaqarfimmi meeqqat periarfissinneqarlutik atuaqqinnissaminnut. Ukiorpassuarni piniartutut inuutissarsiorneq Uummannami pingaarnersaasimavoq, kisiannili ukiuni kingullerni aalisarneq kommunemi inuutissarsiutit pingaarnersarilersimavaat innuttaasullu qaleralinnik aalisarnermik tunngaveqartumik suliffissaqartinneqalersimapput aalisarnermik fabrikimilu sulinermik. Soorunami aamma atuarfik sunnerneqarsimavoq. Ukioq manna siullermeertumik klasset marlunngorlugit agguataarneqarsimapput.
Aamma atuartut 11-nik ukiullit Danmarkimukartinneqartarsimapput qaammatini pingasuni 1960-kkunni aammalu ukioq ataaseq tappavaniittalersimallutik. Ukioq manna siullermeertumik atuarfiup 16-nik ukiullit Canadamukartissimavai qaammat ataaseq missiliorlugu tuluttut ilinniariartortillugit. Tamanna iluatsissappat sinerissamiit taamaaliortoqartalissooq.
1968-mi ilinniartitsoqarsimavoq 16-nik, 12-it qallunaat nunaanni seminariami ilinniarsimasut, marluk kalaallit nunaanni seminariami ilinniarsimasut, ataaseq ajoqissat ilinniarfianni ilinniarsimasoq kiisalu stud.mag ataaseq atuartitsisarsimapput meeqqanut 228-nut. Ullumikkut meeqqat 270-it missaarpaat, piffissap ingerlanerani atuarfittulli allatut nikeralaarsinnaasarlutik.
Sapaatip akunneranut ataasiarlutik atuarfimmi paaliartarsimapput illoqarfiup timersortarfittaanissaata tungaanut. Aamma 1970-kkunni atuarfimmi nerisitsisoqartarpoq.
Atuarfik allineqarpoq 1988-mi taamanikkullu katersortafitoqaq klassetut atorneqarsimavoq. Kingullermillu allanngortiterneqarpoq 2004-mi nutaanngitsortaa peerlugu nutaarluinnarmik inaatigut sanasoqarmat. Ilaatigullu tassaniippoq ilinniartitsisut inaat, nutaartaata isuani isikkivigilluinnarluni.
Aatsaat 1985-mi atuarfik taaguuteqalerpoq Edvard Kruse-p Atuarfia, E.K.A.-mik naalisarlugu . Edvard Kruse ajoqiunerusimavoq, politikereq, taalliortoq, titartaasartoq pattattorlu maani illoqarfimmi, kingullermillu allanngortinneqarluni 2008-p aasaani, pissutigineqarluni oqaaseqatigiit "Edvard Krusep Atuarfia" eqqunngitsumik paasissutissiisoq, tassami tassani Edvard Kruse atuarnikuunngisaannarmat.