Uummannaq
.jpg)
Uummannaq illoqarfiuvoq alianaatsoq taamatullu aamma alianaatsigisumik avatangiisilik.
Siullermik tikikkaanni malunginiangassaq tassaavoq qaqqanik portusuunik avatangiiseqarnera. Taamaattumillu isigisat sungiusimallu aallaqqaammut salloqittaasutut ittarput. Isigisaq ungasinngitsutut isikkulik ornileraanni ila ungasissusia.
Illoqarfik
Uummannap illoqarfia 1300-t sinnilaarlugit inoqarpoq. Illoqarfiup anginnginnera pissutaalluni eqqissisimanartuuvoq toqqissisimanarlunilu.
Inuussutissarsiornikkut aalisarneq pingaarnersaavoq, qaleralinnik ningittakkersornikkut aalisarneq. Taannalu illoqarfiup piunerani tunngaviulluinnarluni. Uummannarlu nunatsinni qaleralinniarfiunersaavoq. Tamaanilu pisarineqartut maani poortuinnarsinnarlugit illoqarfinnut allanut nassiunneqartarput suliareqqinneqariartorlutik.
Inuit illoqarfimmi inussiarnersuupput ilassiuminartut. Sivitsunngitsoq kaffisoriartoqquneqassaatit, tassami illoqarfimmi pingaartinneqarpoq arlaannik pisoqartillugu kaffisortitsinissaq- amerlasuutigut nerisassanik ingaanik allanillu kalaaliminernik ilallugit. Tassa nuanneq. Misigisariaqarpat.
Illoqarfik inuussutissarsiornikkut naammaginartumik ingerlavoq suliffissaaleqisut amerlagisassaanatik. Taaneqareersutut aalisarneq pingaarnersaavoq, taamaattorli siunissamut neriuummik nutaamik piusoqalerpoq- Maarmorilik, naak tusagassiutitigut tusartakkat killormut ikkaluartut. Taamaattorli illoqarfimmi neriuppungut aallartissasoq illoqarfimmullu nunaqarfitsinnullu suliffissaqarnikkut iluaqutaalluarumaarluni.
Inngili Qernertoq. Assiliisoq: Aatsitaasaqarnermut Pisortaq.
Meeqqeriviit
Illoqarfipput meeqqeriveqarnikkut ajornartorsiuteqanngilaq, tassami utaqqisoqannginnami. Taamaattumik mikisunik meeraqaraanni Uummannamut nuuttoqariaannaavoq.
Meeqqerivik nutaajuneq, marluupput.
Allat
Inissaqarnikkut annerusumik ajornartorsiuteqanngilaq, allaammi illoqarfitsinni illorpaalussuit inoqanngillat. Taamaattumillu ilinniartitsisut Uummannamut nuuttut amerlanertigut ingerlaannaq initaartinneqartarput.
Uummannaq ukiukkut, kangerluup iluanut isikkivik.
Uummannaq ukiuunerani seqineqalersillugu nuannertupilussuuvoq. Februaarimiit upernaajunera tamaat seqinnikkajupput, taamatullu sikukkut aalisarneq nuannersisarluni.
Takorloorneqarsinnaasutut ukiuunerani immakkut attaveqartanngilangut, taamaattumillu timmisartukkuinnaq kujammut avannamullu ingerlasoqarsinnaalluni, taamatuttaaq aamma nunaqarfinnut.
Pisiniarfiit
 big.jpg)
Uummannami ulluinnarni pilersorneqarneq naammaginartumik ingerlavoq, naak illoqarfinnut anginerusunut nallersuunneqarsinnaanngikkaluarluni. Nerisassatigut ukioq naallugu naammanginartumik pilersuisoqarpoq, maluginiangassaavorli illoqarfinnit anginerusunit maani naliginnaasumik akisunerusarmat. Aamma taamaappoq kallerup inneratigut.
Qulaani takuneqarsinnaavoq KNI Pilersuisup pisiniarfia. Taakkua avataatigut Rema KNI Nærbutikkilu nerisassanik tuniniaasuupput. Rema angisuujunngikkaluarluni pitsaasunik nioqquteqarpoq. Aamma allanik pisiniarfeqarpoq atisaarniarfiusunik allanillu tuniniaasunik.
Allakkerivik/Banki
Uummannaq allakkeriveqarpoq bankiutigisumik (Grønlandsbankimut kiffartuussisoq). Allakkat sapatip akunneranut pingasoriarlutik tikittarput.